الجمعة، 15 يوليو 2011

{ استبيان ظريف طريف ~

السلام عليكم ورحمة الله وبركاته ,,

وش اخبااااااااااااار الجميع ؟
كل قراء ومتابعين مدونتي المتواضعه ,,
أتمنى أن تكونوا كما تمنيتم وأفضل ,,

تراني شرهه عليكم ,,
ورا اخر تدوينه ماعلقتوا عليها
<< موب غصب يتركون تعليق ترا خخخخ ,,
المفروض اني ازعل ولا عاد أدّون بس وش اسوي منيب أدل درب الزعل ,,
<< يازينك ساكته ,,
و ترا التعليق مفتوووووووح حتى للزوار مو شرط يكون عندك يوزر(حساب)
<< قلنا مو غصب يعلقون :فيس عصّب:

المهم ,,
مالكم بالطويله ,,
انتم خابرين ( أنتم عارفين_ لغير الناطقين باللهجه النجديه_)
اني السنه اللي راحت صرت مترسه(مدرسه=معلمه) ودخلت التعليم من أوسع ابوابه
<< انقلعي تراها أهليه وانتهى عقدك بعد خخخخ ,,
على طاري المعلمه والتوظيف وجدارة ,,
اليوم مسويه نفسي فيها ورحت أعدل بياناتي في جدارة عشان أدّخل خبرتي
يوم خلصت واقرا ذاك الخبر في موقعهم اللي قهرني قهراً مبرح ,,
شوفوا وبصوا وأقروا بعينكم ,,

وللمعلوميه انا ماحطيت وظيفه غير تعليميه حطيت بس تعليميه ,,
يعني راحت على المفاضله هالسنه وسنه 1433 حقت غير التعليميه
يعني يالله يفكرون يدخلوني في 1434 هـجري وبعد مايدخلوني مهوب موظفيني على طول ,,
أخـ بس ,,
( يالله مادري وش الخيره فيه )

نرجع لسالفتنا ,,
المهم اني معلمه إبتدائي
وعلى آخر الأيام يوم خلصنا المناهج قلت لهم (كنت عند خامس إبتدائي)
كل وحده تطلع ورقه وتكتب السلبيات اللي فيني والإيجابيات ,,
قلت مو شرط تكتبون أسمائكم عشان اللي مستحيه تكتب عيوبي ,,
وماقصروا كتبوا ,,
للاسف اغلب الاوراق ضاعت ولقيت تو اربع اوراق
صورتها وهذي هي ,,

http://dc16.arabsh.com/i/03163/f7darvdnf9ri.jpg
نبدا بالسلبيات ..
1_خطك << يافشلاااااه  خطي ماعجبهم هههههههه هذا وخطي بالانجليزي احسن وازين بمليون مره من العربي ههههههه ,,,
2_ اوراق العمل << مابالها ياطالبتي العزيزه ؟؟ الظاهر انها ماتحب اوراق العمل بس شي اساسي ياطالبتي مالنا غناة عنه ..
3_ عدم العصبيه << غريبه ,,:فيس مستغرب: احس نفسي عصبيه نوعاً ما ,,
4_ الاختبارات بعد الدرس في الحصه المقبله << الظاهر انها تبي الدرس لعب مافيه اختبارات :سيكو: 

الإيجابيات "
1_ شرح الدرس <<< لااااا ياشيخه !! احسب نفسي مااشرح هههههههههه
2_ عدم المساعده في الاختبار << يعني قصدها مااغششهم يانا ماحب الغش بشكل فضيع ,,
3_ عدم التأخير عن الحصه << بلا وراي إداريه ماتخليني اتاخر ههههههههه ,,
4_ طيبه ومتعاونه << ماعليك زود ,, مادري ليه احسها كاتبتها مجامله خخخ ,,



نجي للثانيه :


http://dc16.arabsh.com/i/03163/v6rrmvr00tf5.jpg

يعجبني و لا يعجبني
حسيت الطالبه تلعب معي خخخخخخ
لا يعجبي لا شي
طيب ممكن احد يفهمني ليه كاتبه لا شي ثلاث مرات
على السنه مثلاً ؟؟  ولا عشانها كاتبه ثلاث مميزات ,,
طيب نعلق على ( يعجبني ) 
1_ ماتعصبين كثير << افهم من كلامها اني اعصب بس شوي :حلو: اللي بعده ,,
2_ تدورين على مصلحتنا <<< :علامات أستفهام: نلعب غميمه انا ومصلحتكم مثلاً !! ,,
3_ جميله <<< :فيس أستحى: <<لا لا صراحه ماأقدر  .. ماعندي تعليق  ,,
 (( ملاحظه للي يتابعوني ولا قد عمرهم شافوني ترا منيب جميله لاتصدقون بزر خخخخ ))



نجي للي بعدها :

http://dc16.arabsh.com/i/03163/5zuw26oag38f.jpg

السلبيات فاضي
ابدا مو معناه مافي سلبيات بس وحده من الثنتين يامستحيه مني او من كثر العيوب احتارت وش تحط فقالت اخليه فاضي ,,
الإيجابيات :
1_ أحبك إذا ضحكتي  << يعني اذا ماضحكت ماتحبني يعني اغلب الاوقات ماتحبني يعني ماتحبني خخخخ ,,
2_         << مافهمت شي من السطر الثاني ابداً حاولت بس ماقدرت_ اللي فهمت تعلمني_
3_ ذقت فاللبس حلو << اتوقع تقصد ذوقي في اللبس عزيزتي الطالبه تراها كلها تنوره سوداء وبلوزه رسميه حقت دوام على العموم شكراً  ,,, 



نجي للي بعدها :

http://dc16.arabsh.com/i/03163/h0mriemjxgay.jpg
اولاً هذي الطالبه احبببببببببببها
مادري عشانها بنت عم صديقتي هيوف او لها سخره
المهم اني احبها من قلب ودايم احاول مااحّكم مشاعري لا في التصحيح ولا في المعامله عشان اعدل
بس جوا قلبي احبها :قلب ينبض:

السلبيات :
ماشاء الله تبارك الله 
<< وش قصدها ؟؟ خخخخخخخ
الإيجابيات :
1_ شرح حلو :: << انتي أحلى وهـ بس ,,
2_ نظافه << دعاية تايد هههههههه 
3_ خلق << خلق زين ولا خلق شين ؟ المهم ناخذها مأخذ حسن خخخخ ,,


في الختام أتمنى انكم أستمتعتوا ,,
هالتدوينه للمتعه فقط ,,
واستبيان بسيط طريف من طالباتي العزيزات على قلبي ,,
كنت أتمنى أنهم كاتبين سلبيات أكثر عشان أصحح من أخطائي واطور نفسي ,,

تم تدوين الكلام اعلاه في
14 _ شعبان _ 1432 هـ
أ. لطيفه بنت فهد
~ ( منبع الطيبه ) ~

الخميس، 14 يوليو 2011

مثل هذا اليوم العام الماضي

http://dc17.arabsh.com/i/03159/8lih97of38uw.jpg
كنت اتصفح التويتر وبعمق 
ومضت الساعات وانا اتصفحه مابين هاشتاق لآخر الى تايم لاين الى المنشن ،، 
لفت انتباهي حساب لوحده توفت مثل هذه الأيام في العام الماضي 
قرأت اخر تغريدات لها ،
كانت قد كتبت ( اشتقت لرمضان اللهم بلغنا اياه ) ،، 
توفت قبل رمضان الماضي قد اشتاقت لرمضان لكن لم تصمه ،،
لحظه تأمل ،، 
كلناا أشتقنا لرمضان القادم بعد ايام قلائل لكن هل سنبلغه ؟؟ 
ام سيحول بيننا الحق !!
نعم كلام قوي لكنه واقعي، وطول الأمل يجعلنا نستبعد ذالك اليوم ،،،،، 
يارب يارب ،،،
 
أختكم ومحبتكم : 
لطيفه بنت فهد 
منبع الطيبه 
شعبان 1432 هـ