{ حلاوة الذكرى ~

السلام عليكم ورحمة الله وبركاته ~ 

بعد ماعطلوا الابتدائي ,,

رحنا لمدرسة المتوسط والثنوي التابعه لنفس مدرستنا لكن بادراة منعزله ومبنى منعزل في مكان ثاني ,,

نراقب علي الطالبات ..

طبعا الموضوع كان اختياري اللي تبي تروح واللي ماتبي كيفها .. 

المهم ان المدرسه هي نفسها اللي درست فيها الثنوي ,, 

دخلتها وبدت الذكريات تنكب على مخيخي من كل جانب ,, 

في كل مكان فيه ذكريات حلوه ,, 

طبعا سنه ( اول وثاني ) ثنوي كانت اجمل مرحله في حياتي الدراسيه كلها ,,

كان فيه انواع السعة صدر والاستهبال ,, 

صورت بـ جوالي بعض من ساحات الخارجيه للمدرسة ,, (للذكرى ) 

مع اني احتفظ بصدري عشرات الذكريات في هالمكان ,,

سريع الزمن
كيف كنا وكيف صرنا
وكيف تبدلت الأوظاع
أمس بنفس المكان تسلم لنا الاوراق
واليوم بنفس المكان نسلم لهم الاوراق
أمس ندور بساحه وضحكنا ماله حد
نصرخ ونط ولا همنا حد
والله أمس بنفس المكان هنا بالضبط
معي الكتاب واشق منه ورقه ورقه وباستهتار
واقول مع كل ورقه تنشق
( انجح .. ماانجح .. انجح .. مانجح )
وقتها ابد ماكان عندي هم
غير كيف اضحك الشله
وكيف نلعب هالمره 

هنا والله تحدوني
ادور على المبني بدون جزمه
وقبلت والله التحدي
وخذيت الدوره بكل جرئه
أدور وحافيه رجلي
ورجعت وخبو الجزمه
اعرفك فلانه طليعها
مقلبك علي مايمشي 

.
انا والمكان اليوم نتشابه
جمعتنا الايام الدوراه
نفس المكان ماتغير
سوا الوان جدرانه
وانا حطيت شوي مكياج

انا اليوم وانا امس
 فيه شوية فرق
امس بالمريول وشعري قرن
واليوم بتنوره سوداء وصوت كعب

واكبر فرق
بيني اليوم و بيني أمس
أني اليوم أشيل الهم

^^^

هنا كنا نصف طابور ,,

( بوابة الخروج )

وهنا عند بوابة الخروج
في آخر يوم
واخر سنه تجمعنا
وقفنا نبكي
وقفنا ندمع
وقفنا نرجي اللحظه
توقف بس لحظه
صحيح اللحظه ماطاعت
وقبل ترحل همست
.
.
( تكفيكم حلاوة الذكرى  )

بعثرت حروف من خاطر

لطيفه بنت فهد 
~ منبع الطيبه ~

صفر 1432 هـ